You are here

Aufaga Village Fisheries Management Plan_2001

O le afioaga o Aufaga e i le itu i Sasae o le motu o Upolu ma lona faitauaofai e tusa ma le 1,000 aofia ai matai, tina ma tamaitai, aumaga ma tamaiti. E le aofia ai i latou ua faimalaga atu i atunuu i fafo e i ai Niusila, Ausetalia ma le Iunaite Setete o Amerika.

O Aufaga e i ai lona a'au e mai lava i le itu i sasae seia paia le itu i sisifo. O le umi o le a'au e pea ma le 20-50 mita mai le matafaga. O le mamao o le aau mai le matafaga e tusa ma le 1-2 mita. O le vaega pito loloto o le aloalo e tusa ma le 50-200m i taimi e sua ai le tai ae 50-200m nisi o vaega o le gataifale pea oo ina pe le tai i taimi ae le i afaina i afa.

E tele ituaiga faigafaiva e mafai ona faatinoina i le aloalo o le afioaga o Aufaga. O nisi o nei ituaiga faigafaiva e i ai matatao, uaua malau (toso), ma le faaaogaina o upega (e teleina faatinoina e alii) mo le fofoga taumafa a le aiga pe faatau foi. O le aoina ma le eliina o figota i luga o le aau o le galuega patino lava lea a tina ma le fanau mo taumafa a le aiga.

O le faatinoina o faigafaiva-le-talafeagai e i ai fanaia, ava-niu-kini ma vailaau oona ua matua faasaina lava i lalo o le pulega mamalu a Alii ma Faipule. E tutusa lelei lava ma le faaaogaina o tane maulu ma mea manava (SCUBA gear) i fagotaga ua matua faasaina lava ona toe faatinoina i gataifale o le afioaga.

O le tele o i'a sa maua i aso ua mavae ua faigata ona maua i aso nei. O i'a o le aloalo e i ai lo, poge ma alogo, anae ma mataeleele sa tele ma faigofie ona maua i le 30 tausaga talu ai. E oo foi i figota e i ai le sisi, faisua faapea sea, loli, mamao ma fugafuga sa tele i aso ua mavae. I le taimi nei, o nei i'a ma figota ua pau maualalo le faitau aofai ma e tele ni itula e faaaluina mo fagotaga faatoa maua se meaai mo le aiga, pea faatusatusa i le 30 tausaga ua mavae.

O lenei tapenaga sa saunia lava e alii ma faipule ma tagata nuu o Aufaga faatasi ai ma ni fautuaga ma le lagolagosua a le Ofisa o Faigafaiva o le Matagaluega o Faatoaga ma Faigafaiva.

O le autu lenei sa faatalatalanoaina ma malilie autasi i ai vaega taitasi o le afioaga:

1. Ina ia puipuia le siosiomaga o le gataifale ma,

2. Toe faatupulaia le tamaoaiga o le gataifale mo tupulaga o le lumana'i

Category: