You are here

Faleu, Manono-uta Village Fisheries Management Plan_2009

O le afioaga o FALEU-MANONO e i le itu i Matu i Sísifo o le motu o Upolu, ma o se tasi o afioaga o le Itumalo o Aiga i le Tai. E matagofie ona laufanua ma lona atufalega faapea foi le talafatai o le gataifale.

O fuafuaga faataatitia i lenei Tusi Taiala e unaia ai le vaai a lelei aemaise le pulea ma le fuafua tatau o le faaaogaina o le tamaoaiga o le gataifale ma le siosiomaga o FALEU-MANONO.

O le afioaga o FALEU MANONO e tu matafaga ma e gatasi maualalo lona laufanua. O lenei afioaga e iai lona a'au pe a ma le 300 mita le umi. O le mamao o le a'au mai le matafaga pe tusa ma le 800 mita. O le vaega e aupito sili ona loloto o le aloalo pe a pe eleele le tai e tusa ma le 50 futu. E iai foi se vaega tele o le talafatai e ola ai le togatogo, ma e faaaogaina tele mo le matauina o paalimago, ma i’a e pei o ta iva, filoa, anae ma isi. E tusa ma le 5 eka le tele o le laufanua ua ola ai lenei togatogo.

I le faatinoga o faigafaiva i le afioaga, o alii e faatinoina fagotaga maulu i le aloalo aemaise tua’au, pe a ma le 15-20 faifaiva e fagogota pe ta’i faatasi i le faatolu i le vaiaso. I fagotaga i tuaau a alii, e tele ina faaaogaina ai paopao. I fagotaga a le itupa o tamaitai, pe a ma le 7-15 i latou e fagotaina figota ma isi taumafa o le sami.

O nisi nei o ituaiga faigafaiva eseese o lo o faatinoina mo le fofoga taumafa o aiga, faalavelave i totonu o le afioaga ia po o le faatau foi mo tupe maua. O ia fagotaga e iai le:-

 Maulu ma le matatao/mata;

 Upega ma tili;

 Fagā pusi;

 Lama,

 Tuiga sea, loli, fugafuga mama’o ma ape faapea aoina o aliao ma faisua i luga o le a’au o lo o faatinoina e tina, tamaitai ma le fanau.

 

O le tele o i’a sa maua i aso ua mavae ua faigata ona maua i aso nei, ae a maua foi ua faaitiitia le faitau aofai faapea le lapopoa. O i’a ta’atele i le aloalo e iai:-

 Mataeleele;

 Anae,

 Fuga,

 Malauli,

 Ume ma isi

O faafitauli ma suiga ua iai nei gataifale o FALEU MANONO e pei ona ta’ua, o le āia o le gataifale i galu malolosi ma afā faapea le faaitiitia o i’a maua ma figota sa tele i aso ua mavae ona o le soona fagotaina ma le faaaogaina o faigafaiva le talafeagai e pei o fanai’a, ava niukini, tu’iga ma isi. O le popolega o le afioaga ona o le tele o nei faafitauli i le gataifale o lo o faamoemoe iai le fofoga taumafa e le gata mo le taimi nei ae i le lumanai. O lea ua a’e ai se tofa i alii ma faipule ina ia pulea tatau ma vaaia lelei punaoa ma alamanuia o le gataifale.

 

O le autu lenei sa faatalatalanoaina ma malilie autasi i ai vaega uma o le afioaga o FALEU-MANONO:

 Ia vaaia lelei ma pulea tatau le siosiomaga o le gataifale ;

 Toe faatupulaia punaoa ma tamaoaiga o le gataifale mo tupulaga i le lumanai.

 Puipuia ma faasaoina togatogo ma ona tamaoaiga

 

Category: