You are here

Matautu, Faleapuna Village Fisheries Management Plan_1998

O le autu lenei sa faatalatalanoaina ma malilie autasi iai vaega taitasi o le afioaga

 Ina ia Puipuia le Siosiomaga o le Gataifale.

 Toe faatupulaia I’a ma Figota mo tupulaga o le lumanai.

Ua ioeina e le fonotaga a le Komiti Faufautua mo le Va’aia Lelei o i’a ma figota (KFVL) i le Aso 4 o Mati 1998, o le Komiti (KFVL) lava lenei latou te faamalosia ma unaia vaega eseese uma o le afio’aga auā le puipuia ma le faasaoina o atinae ma alamanuia o le gataifale o Faleapuna. O lenei foi Komiti o loo gafa ma le tapenaga o tulafono aemaise o vaega uma e tatau mo le fuafuaga tatau. O le tele foi lenei tapenaga o le a tuuina atu i le pule mamalu a Alii ma Faipulemo le pasiaina. O lenei fuafuaga ua faamoemoe ina ia oo atu i le tolu tausaga o loo fa’aaogaina pea ae peitai afai ae iai se suiga, ua ao loa ona toe su’esu’eina lenei fuafuaga.

O le afio’aga o Matautu Faleapuna e i le itu i mātū i sasae o le motu o Upolu. O le faitau aofa’i o tagatanuu o lenei alalafaga e tusa ma le 600 i le 650 i latou o lo’o alaala ai. O lenei faitau aofa’i e le o faitaulia ai i latou ua malaga atu i atunuu mamao e pei o Amerika, Niu Sila, Ausetalia ma isi atunuu e nonofo mau ai.

O le afio’aga lenei o Matautu Faleapuna e iai lona a’au mai le itu i sasa’e se’ia pa’ia le itu i sisifo i le umi e tusa ma le 1200 i le 1250 mita. O le mamao o le a’au mai le matafaga e tusa ma le 100 ile 150 mita.

O lenei afioaga, e mamalu tele ona pulega, aua e puleaina lava e le Fono a Alii ma Faipule o le afioaga. O le aumaga e lava saunia i taimi uma mo le tautuaina o matai. O tina latou te avatua fautuaga lelei mo ni mataupu tau lotoifale o le afio’aga.

O Matautu Faleapuna e faalagolago tele i le gataifale mo le mea-taumafa. Ua mafua lenei mau, ona o le faitauaofai o tama tane latou te fagotaina le gataifale i le sili atu ma le tasi le aso o le vaiaso, e 20 – 25; ae e 20 – 22 tina ma tamaitai fagogota. E le gata i lea, ae iai foi i latou o loo latou fagotaina tua’au o le afioaga, o ni tagata ia se toa 10 i le 15 lo latou faitau aofai.

E 3 – 5 paopao e faaaoga e le au-faifaiva mo fagotaga ma faigafaiva. O le faafitauli o loo feagai nei ma le afioaga, ma o loo latou talosagaina foi i le Ofisa o Faigafaiva, o se alia fagota lea e faa-faigofieina ai fagotaga i tua’au mamao. O le afioaga lenei, e faatagaina soo se tagata mai isi afioaga tua’oi ona fagogota ai i lo latou gataifale.

O le faatinoina o faigafaiva i le afioaga, e iai faiva ua iloga ma o loo faatinoina lava e le au-fagogota i aso uma mo meataumafa. O faiva taatele nei i le afioaga, e iai le mata, fana,uaua, seu, ma le matau, ma o i’a lava nei e masani ona maua ai i o latou faiva, e iai le alogo, fuga, malau gatala, ma mataeleele. Na ta’ua e le afioaga, ua faigata tele nei vaitau, ona ua umi ma tele se taimi e faaaluina mo fagotaga, faatoa maua ni i’a. O aso ua tuana’i pe tusa o le sefulu tausaga ua te’a, sa na o le 30 minute i le 1 le itula sa faatinoina ai ni faiva, ona maua lea o le anoano o i’a; a’o nei vaitaimi, ua sili atu i le 2 – 3 itula e faaaluina i fagotaga, faatoa maua ni nai i’a ma ni figota. O le faafitauli ogaoga ua tulai mai ma ua va’a ia i le gataifale, ua tau leai ni i’a maua ma ni figota i ogasami o Faleapuna.

Category: