You are here

Salesatele Village Fisheries Management Plan_2007

O le afioaga o Salesatele i Falealili e i le itu i saute i sasa’e o le motu o Upolu. O lona faitauaofai e tusa lea ma le 450 tagata e aofia ai matai, tina ma tamaitai, aumaga, alo ma fanau laiti. E le aofia ai i latou ua faimalaga atu i atunuu i fafo e i ai Niusila, Ausetalia ma le Iunaite Setete o Amerika.

O Salesatele e i ai lona a'au e mai lava i le itu i sasae seia paia le itu i sisifo i le umi e pea ma le 300 mita. O le umi o le a'au e pea ma le 250 mita mai le matafaga. O le vaega pito loloto o le aloalo e tusa ma le 2.5 mita i taimi e sua ai le tai, ae 1 mita nisi o vaega o le gataifale pea oo ina pe le tai.

 
O lenei afioaga e mamalu tele ona pulega aua e puleaina e le Fono a Alii ma Faipule lava o le afioaga. O le aumaga e lava saunia i taimi uma aua le tautuaina o matai, o tina latou te avatua fautuaga lelei mo ni mataupu tau lotoifale o le afioaga.

 

E tele ituaiga faigafaiva e mafai ona faatinoina i le aloalo o le afioaga. O nisi o nei ituaiga faigafaiva e i ai le faaaogaina o matatao poo tao fagota i lama poo mata tautā, uaua malau (toso), uaua atule, ma le faaaogaina o upega (e tele ina faatinoina e alii) mo le fofoga taumafa o aiga pe faatau fo’i. O tuiga sea, fao tuitui ma vaga, aoina ma le eliina o figota i luga o le aau o le galuega patino lava lea a tina ma le fanau mo taumafa a le aiga.

O le faatinoina o faigafaiva-le-talafeagai e i ai fana i’a ma ava-niu-kini ua matua faasaina lava i lalo o le pulega mamalu a Alii ma Faipule. E tutusa lelei lava ma le faaaogaina o tane maulu ma mea manava (SCUBA gear) i fagotaga ua matua faasaina lava ona toe faatinoina i gataifale o le afioaga.

O le tele o i'a sa maua i aso ua mavae ua faigata ona maua i aso nei. O i'a o le aloalo e i ai lo ma pau’ulu, poge ma alogo, ume ma filoa, faapea ma le palolo sa tele ma faigofie ona maua i le 30 tausaga talu ai. E oo foi i figota e i ai le sisi, faisua, vaga, tuitui faapea sea, loli, mamaō ma fugafuga sa tele i aso ua mavae. I le taimi nei, o nei i'a ma figota ua pa’ū maualalo le faitau aofai ma e tele ni itula e faaaluina mo fagotaga faato’ā maua se meaai mo le aiga, pe’a faatusatusa i le 30 tausaga ua mavae.

 
O Salesatele e i ai ona tulafono i aso ua mavae e faasaina ai faigafaiva-le-talafeagai e pei o fanaia, ava-niu-kini, vailaau oona, lama moli-uila ma tane maulu (SCUBA gear) ua matua faasaina ona toe vaaia.

Ua faasaina foi tagata mai isi afioaga ona toe fagotaina gataifale o Salesatele. E ui lava ina ua i ai tulafono e pei ona taua, ae le o atoatoa lona faatinoina ma lona va’aia ona o le lē aloaia e le ‘au faifaiva mai isi afioaga. O le isi itu o le mamao lea i tai o nofoaga o loo faatinoina ai nei ituaiga o faigafaiva atoa ai ma auala o loo faaaogaina.

 

O lenei tapenaga sa saunia lava e le Fono a Alii ma Faipule ma tagatanuu o Salesatele faatasi ai ma ni fautuaga ma le lagolagosua a le Ofisa o Faigafaiva o le Matagaluega o Faatoaga ma Faigafaiva.

Category: