You are here

Sasaai Village Fisheries Management Plan_2010

E faamoemoe tele le fofoga taumafa o afioaga i faigafaiva ma punaoa o le gataifale ae le gata i lea o atinae mo le tamaoaiga o aiga. I le tele o afioaga, latou te le o faatauaina le pulea tatau ma le vaaia lelei o punaoama le siosiomaga o le gataifale. O le faaaogaina o auala faa-onapo-nei mo fagotaga e iai mea manava, upega faapea tili mataninii ina ia tele ai i’a maua ua tele ai na faaitiitia ma faaleagaina nofoaga o i’a, figota ma meaola o le sami. Ua avea foi le tanumia o vaega o le sami mo eleele-fou (fanua) faapea le faatinoga o faigafaiva le talafeagai pei o fanaia, ava niukini, vailaau oona ma faamo’a /tu’iga ua tele ai aafiaga i le gataifale. O nei faafitauli ua matua faaitiitia ai i’a ma figota ae le gata i lea o aafiaga i mala faalenatura e pei o galu malolosi faapea matagi ma afa pei o Ofa (1990), Valelia (1991), Heta (2004) ma le galu lolo/tsunami (2009).

O nei faafitauli pei ona ta’ua faapea le soona fagotaina o aloalo ua faapea ona faatamaia ma faaitiitia ai punaoa o le sami. O lo o vaaia pea le taugata ma le siisii i luga o tau o i’a faapea figota ma ua avea ma auala ua faamoemoe tele ai tagata Samoa i meaai tuu aisa

ma meaai tuuapa o lo o faatauina mai atunuu i fafo. O se atugaluga lea o loo iai i le taimi nei ae le gata i lea o le faamoemoe tele i le tupe aua mea taumafa i aso uma.

O le Polokalame Faasao mo le Pulea Tatau ma le Vaai a Lelei o Gataifale o Samoa na amata mai e le Vaega o Faigafaiva i le tausaga 1995 i se faatupega ma le fesoasoani mai o le Malo Ausetalia (AusAid) mo le lima tausaga. Ma ua faaauauina nei e le Malo o Samoa lenei polokalame e ala i le Vaega o Faigafaiva. O lenei polokalame e matua faatauaina tele ai le galulue soosoo tauau ma afioaga aemaise le sao o alii ma faipule faapea afioaga i le pulea tatau ma le vaaia lelei o latou gataifale. O taualumaga o le polokalame e aofia ai le

soalaupuleina ma le fausiaina o Fuafuaga Tatau poo Tusi Taiala e tamauina ai fuafuaga faataatitia a afioaga faapea matafaioi a le Vaega Faigafaiva e lagolago ai lenei polokalame.

Ona o le taua o lenei polokalame, ua a’e ai se tofa i le afioaga o Saasaai e galuelue ma le Vaega o Faigafaiva e fausia lenei Fuafuaga Tatau/Tusi Taiala aua ni fuafuaga faataatitia faapea ni tulafono laiti e lima taitaia ai le afioaga i le gafataulimaina o punaoa o le gataifale.

 

Autu o le Taiala

O le autu lenei sa faatalatalanoaina ma malilie autasi i ai vaega uma o le afioaga: “ Toe faaleleia tamaoaiga o le gataifale mo tupulaga lalovaoa o le afioaga”

 

O isi vaega sini taua sa faaalia ma talanoaina o le:

 Toe faatupulaia I’a ma Figota aua le fofoga taumafa aemaise tupulaga i le lumanai e ala i le Pulea Tatau ma le Vaaia Lelei o Punaoa ma le siosiomaga o le gataifale.

 

FAAMATALAGA O LE AFIOAGA

O le afioaga o SASAAI e i le itu i sasa’e o le motu o Savai’i i le itumalo o Faasaleleaga III. O le toatele o ona tagata e nonofo latalata i le sami pe a ma le 60% ae o nisi e nonofo i fanua i ga’uta. Ua siitia le faitau aofai o ona tagata i le 621 i le 2006, mai le 530 tagata i le tusigaigoa 2001, (Ofisa o Faamaumauga, 2006).

 

Gataifale o Sasaai

E laugatasi laufanua o Sasaai ae maise le itu i sasae e oneone ma laulelei ae o le ogatotonu agai sisifo e fai sigaoa. O le a’au pe a ma le 250-300 mita le mamao mai le matafaga lea ua iai le taligalu.

E lua vaitaele e latalata i le sami o lo o faasimā ma vaaia lelei e le komiti ae tele foi punavai i le gataifale pe a oo ina pe le tai.

Category: