You are here

Tauaoo, Faleasiu Village Fisheries Management Plan_1996

O le afioaga o Tauaoo-Faleasiu e i le itu i saute i sasa’e o le motu o Upolu. O lona faitauaofai e i le va o le 3,300 – 3,700 tagata e aofia ai matai, tina ma tamaitai, aumaga faapea alo ma fanau laiti.

E le aofia ai i latou ua faimalaga atu i atunuu i fafo e i ai Niusila, Ausetalia ma le Iunaite Setete o Amerika.

O Tauaoo-Faleasiu e i ai lona a'au e mai lava i le itu i sasae se ia paia le itu i sisifo i le umi e pe a ma le 300 mita. O le umi o le a'au e pe a ma le 250 mita mai le matafaga. O le vaega pito loloto o le aloalo e tusa ma le 2.5 mita i taimi e sua ai le tai, ae 1 mita nisi o vaega o le gataifale pea oo ina pe le tai.

O lenei afioaga e mamalu tele ona pulega aua e puleaina e le Fono a Alii ma Faipule o le afioaga. O le aumaga e lava saunia i taimi uma aua le tautuaina o matai, o tina latou te avatua fautuaga lelei mo ni mataupu tau lotoifale o le afioaga.

O Tauao’o Faleasiu e i ai ona tulafono i aso ua mavae e faasaina ai faigafaiva-le-talafeagai e pei o fanaia, ava-niu-kini, vailaau oona, lama moli-uila ma tane maulu (scuba gears) ua matua faasaina ona toe vaaia.

Ua faasaina foi tagata mai isi afioaga ona toe fagotaina gataifale o Tauao’o-Faleasiu. E ui lava ina ua i ai tulafono e pei ona taua, ae le o atoatoa lona faatinoina ma lona va’aia ona o le lē aloaia e le ‘au faifaiva mai isi afioaga. O le isi itu o le mamao lea i tai o nofoaga o loo faatinoina ai nei ituaiga o faigafaiva atoa ai ma auala o loo faaaogaina.

O lenei tapenaga sa saunia lava e le Fono a Alii ma Faipule ma tagatanuu o Tauao’o-Faleasiu faatasi ai ma ni fautuaga ma le lagolagosua a le Ofisa o Faigafaiva o le Matagaluega o Faatoaga ma Faigafaiva.

Category: