Autu
“Puipuiga o le Siosiomaga o le Gataifale ma le toe faatupulaia o i’a ma figota mo tupulaga ole lumanai.” - O le autu lena sa fa’atalatalanoaina ma malilie autasi ai vaega e tolu o le Afio’aga o Sapini i taimi o faatalatalanoaga.
Faamatalaga e uiga i le Afio’aga
O le Afio’aga o Sapini i Faga e i le itu i Matu i Sasae o le motu o Savai’i ma o lona faitauaofai e tusa ma le 250 aofia ai Matai Tina ma Tamaitai, Aumaga ma tamaiti. E le o aofia ai i latou ua faimalaga atu i atunuu i fafo, e iai Niu Sila, Ausetalia ma le Iunaite Setete o Amerika.
O Sapini i Faga e iai lona aau e mai lava i le itu i sasae seia paia le itu i sisifo i le mamao pe a ma le 200 mita mai le matafaga. O le vaega pito loloto o le aloalo e tusa ma le valu futu i taimi e sua ai le tai ao nisi vaega e fitu futu pe a pe le tai. O lenei Afio’aga e mamalu tele ona pulega aua e pulea lava e le pule mamalu a Alii ma Faipule o le Afio’aga. O le aumaga e lava saunia i taimi uma aua le tautuaina o matai, a o tina latou te avatuina fautuaga i mataupu tau i loto i fale ole Afio’aga.
Ituaiga Faigafaiva ta’atele
E tele ituaiga faigafaiva e mafai ona faatinoina i le aloalo o le afio’aga o Sapini. O nisi o nei ituaiga faigafaiva e i ai matatao, tosotoso, ma le fa’aaogaina o upega (e tele ina faatinoina e alii) mo le fofoga taumafa a le aiga pe faatau foi. O le faatinoina o faigafaiva le talafeagai e i ai fanaia ma ‘ava niukini ua matua faasaina lava i lalo o le pulega mamalu a Alii ma Faipule.
O le tele o i’a sa maua i aso ua mavae ua faigata ona maua i aso nei. O i’a o le aloalo e iai lo, poge/alogo, fuafua/anae ma mataeleele sa tele ma faigofie ona maua i le 30 tausaga talu ai. E oo foi i figota e i ai le faisua ma fugafuga/mama’o ua tele ni itula e faaaluina i fagotaga faatoa maua se meaai mo le aiga faatusatusa i le 30 tausaga ua mavae.
Tulafono faa-le-nuu e fesootai ma le siosiomaga o le gataifale o Sapini i Faga
O Sapini e i ai ona tulafono e faasaina ai faigafaiva le talafeagai ona faatinoina i o latou gataifale. I le taimi nei, e le o i ai se tulafono e faasaina ai tagata ma i isi afio’aga ona toe fagotaina gataifale o lenei afio’aga.
Tapenaga o lenei Fuafuaga Tatau
O lenei tapenaga sa saunia lava e le pule mamalu a Alii ma Faipule, ma tagatanuu o le afio’aga o Sapini faatasi ai ma ni fautuaga ma le lagolagosua a le Vaega o Faigafaiva a le Matagaluega o Faatoaga ma Faigafaiva.
