O le afioaga o SATALO e i le itu i Saute o le motu o Upolu i le itumalo o Falealili. E tusa ma le 45-50 minute e faimalaga mai ai i le taulagai Apia i se taavale afi. O se afioaga e matagofie ona laufanua, mamā foi lona siosiomaga ma lona talafatai aua e teuteu ma faamamā
e taulele’a faapea le komiti a Tina. O uluai aso Gafua uma o masina taitasi e tauaofia ai le Fono a alii ma faipule mo le soalaupuleina o atina’e eseese ma fuafuaga faatino aua le soifua manuia lautele o tagatanuu o le afioaga.
O SATALO e mamalu ana pulega aua e puleaina lava e le Fono a Alii ma Faipule o le afioaga. O le aumaga (Aualuma a Meleiseā) e lava saunia i taimi uma aua le tautuaina o matai faapea tina latou te avatua fautuaga lelei mo ni mataupu tau lotoifale o le afioaga.
O SATALO, e i ai ana tulafono i aso ua mavae ma o lo o faaauauina pea ma mamalu i le pulega a alii ma faipule. O ia tulafono e matua faasaina lava faigafaiva le talafeagai e pei o:
Fanaia;
Ava niukini;
Vailaau oona;
Faamo’a/Tu’iga;
Faaaogaina faatasi o tane maulu ma moli-uila i lama (SCUBA gear) pei ona matua faasaina i tulafono o faigafaiva.
E ui lava ina ua i ai tulafono e pei ona taua, ae le o atoatoa lona faatinoina ma lona va’aia ona o le lē aloaia e le ‘au faifaiva mai isi afioaga. E le o lelei fo’i ma atoatoa ona faamamaluina e le afioaga nei tulafono. E le’i faasalalauina foi nei tulafono mo le silafia lautele e tagata fagogota. O le auai o SATALO i le polokame lenei o le a galulue soosoo tauau ai ma le Vaega o Faigafaiva ina ia faamalosia ma puipuia malu ai punaoa o le gataifale.
