O Togatogo sa faatusaina i aso ua mavae e pei o ni nofoaga faataufusi palapala ma mataga e lafoai iai le tele o otaota ma lapisi a aiga aemaise o afioaga. Talu ai ona o foliga vaaia o nei nofoaga e toatele nisi ua taina i lalo ma tanuina nei nofoaga aua nisi o atinae faa-le-aiga, pe faa-le-nuu.
Peitai i nei vaitaimi ua tele ona aoaoina ma silafia foi e le toatele o le mamalu o le atunuu le taua ma le aoga tele o Togatogo i le siosiomaga aemaise i meaola ninii o loo feola ma tautuufua ai i nei nofoaga.O togatogo e pei lava o isi laau o le siosiomaga. E latou te faaogaina le vevela o le La e kukaina ai a latou meaai. O nei meaai e maua mai i le La faatasi ai ma minerale maua mai i a’a o le togo mai vai-faataufusi ma vaitafe eteuina i o latou lau-laau.
O lau-laau o Togatogo e tutupu ma toulu-faa-otaota pealava pea i le tausaga atoa ma tausaga uma pe’a faapea e le taina i lalo pe faatamaiaina foi e nisi.
O le tasi lea o taua o Togatogo ona o otaota e mafua mai i ona lau-laau toulu e avea lea ma meaai e tausia ma feola ai le tele o meaola ninii o le gataifale.
O leisi aoga taua o Togatogo ona o nei nofoaga e sulufai iai meaola ninii mai i o latou fili.
O leisi aoga taua o le avea lea o nofoaga o Togatogo ma nofoaga e tautuufua ma fanafanau ai nisi o i’a ma figota o le gataifale.
O le isi foi aoga o Togatogo o le avea lea o nei laau ma puipuiga muamua o alalafaga tu-matafaga i ni faalavelave faa-le-natura e pei o Galu Lolo, Galu malolosi, Afa, Matagi Malolosi ma isi.
E ui lava la i le aoga ma le taua tele o Togatogo ua tatou iloa nei, ae peitai o loo iai lava nisi o loo manatu pea o nei nofoaga e tatau ona taina i lalo ma tanumia aua atinae eseese e mafai ona faatinoina i nei nofoaga. O nisi o atinae e aofia ai le fausiaina o maota o aiga, fausiaina o atinae faa-pisinisi ia ma isi lava o atinae.O lenei la polokalame o le toe totoina ma le faasaoina o Togatogo i se vaega o le gataifale o Vaiusu, o se galuega ua sili lea lona taua. Ua faailoa mai i lenei polokalame le faa-tauaina o Togatogo e Alii ma Faipule aemaise ai foi Komiti o Faletua ma Tausi o lenei nuu. O le faamoemoe o lenei galuega o le toe totoina lea o le togatogo i gataifale o Vaiusu aua le toe atinaeina lea o le lelei o le siosiomaga aemaise mo le toe faatamaoaigaina o i’a ma figota.
O lenei fuafuaga o mo le Pulea Lelei o Togatogo ma le Gataifale o Vaiusu Faleata ua saunia e Alii ma Faipule faatasi ai ma le Faufautua a le Komiti o Faletua ma Tausi. O loo faatasi ai foi ma le lagolagosua a le Vaega o Faigafaiva o le Matagaluega o Fa’atoaga ma Faigafaiva (MAF).
