O faigafaiva i Samoa e taua tele aua o se tasi lea o auala e maua ai le fofoga taumafa aemaise lava i nuu ma afioaga i tua. I le tele o afioaga, latou te le o faatauaina le vaaia lelei o le tamaoaiga ma le siosiomaga o le gataifale. O le aumaia ma le faaaogaina o ituaiga faigafaiva faa-onapo-nei e i ai mea manava, upega ma tili mataninii, ma vailaau oona e faamata faigofie ai ma tele i'a maua ae o loo faatamaia ai le siosiomaga o le gataifale ma ona tamaoaiga. O le faatinoina foi o atinae i luga o le gataifale ua faaleagaina ai le tele o nofoaga ma le miliona o meaola o le gataifale.
O le polokalame o le faasaoina o le gataifale na amata mai e le ofisa o faigafaiva i le tausaga 1995. O le faamoemoe o le polokalame ina ia toe tapue mai le tamaoaiga o le gataifale ma puipuia ai le siosiomaga. O taualumaga o le polokalame e aofia ai le soalaupuleina ma le fausiaina o se Tusi Taiala. O lenei Tusi Taiala o loo tamauina ai fuafuaga faataatitia a le afioaga ma le ofisa o faigafaiva. O nei fuafuaga faataatitia e unaia ai le pulea lelei ma fuafua tatau o le faaaogaina o le tamaoaiga o Vailuutai.
O Vailuutai e i ai lona a'au e mai lava i le itu i sasae seia paia le itu i sisifo i le mamao pea ma le 700-800 mita. O le umi o le a'au e pea ma le 200-300 mita mai le matafaga. O le vaega pito loloto o le aloalo e tusa ma le 30 futu i taimi e sua ai le tai ae 30 futu nisi o
vaega o le gataifale pea oo ina pe le tai.
O lenei afioaga e mamalu tele ona pulega. O le aumaga e lava saunia i taimi uma aua le tautuaina o matai, o tina latou te avatua fautuaga lelei mo ni mataupu tau lotoifale o le afioaga.
