O le Polokalame o le Faasao na amataina e le Ofisa o Faigafaiva i le tausaga e 1995. I le amataga mai la o lenei polokalame sa lagolagoina malosi e le Malo o Ausetalia e tauala mai i le AusAID le faatupeina mo le 5 tausaga seia oo mai i le tausaga e 2000, ma faamuta ai loa lana fesoasoani. I lea lava tausaga, sa tauaveina mai ai loa e le Malo o Samoa le faatupeina o lenei polokalame taua. O le talitonuga ma le faamoemoe autu o le tele o nei afio’aga, o le a silasila lea i le lumanai manuia mo tagata lautele o le afio’aga aemaise ai o tupulaga lalovaoa.
O le polokalame o le faasao e galulue soosoo-tau’au ai le ofisa ma afio’aga taitasi i nisi o fuafuaga faataatitia aua se lumana’i manuia aemaise o le toe faa-tamaoaigaina o le gataifale. I le amataina o lenei polokalame, e faatinoina ai ni faatalatalanoaga ma vaega eseese o le nuu, e peio le vaega a matai, tina, ma aumaga. E nei fefaasoaaiga e faailoa mai ai faafitauli o loo faafeagai ma le gataifale o le afio’aga. E talanoaina foi aafiaga na mafuaaga o nei faafitauli ms soalaupule ai ni fofo. Sa soalaupuleina loa e Alii ma Faipule, tagatanuu o le afioaga ma le ofisa nisi o fuafuaga faataatitia e foia ai nei faafitauli. O se faataitaiga o se fuafuaga faataatia a le afio’aga i lenei polokalame, o le faia lea o se ogasami faasao e faasa ona solia, kolosiina pe fagotaina foi.
O nisi fuafuaga faataatitia e tele ona faaaogaina mo le pulea ma le va’aia lelei o le tamaoaiga (i’a ma figota) o le gataifale e aofia ai le faasaina o:
Vailaau oona
Fanai’a
Ava-niu kini
Tu’iga, faamoa, saeuga
Fagotaina o i’a ma figota laiti
Upega ma tili matanini’i
Lama moli-uila i po
O nisi o fuafuaga o Tusi Taiala i le tele o afio’aga mo le pulea tatau ma le va’aia lelei o le siosiomaga o le gataifale e aofia ai le:
Aoina o le alamea (crown of thorns)
Faasaina le laueseina o oneone mai le matafaga
Faasaia le lafoai o lapisi i le gataifale (matafaga)
O lenei polokalame e taua tele mo le lumanai manuia o Samoa ma ona tagatanuu. O le faaleleia ole siosiomaga ma le faatuputupulaia o le tamaoaiga o le gataifale os e faamoemoe e talitonu e mafai ona faatinoina i o tatou lava lima. E faa-tauaina tele le lagolagosua a le Pule ma le Faamalumaluga a Alii ma Faipule o afio’aga i lenei polokalame.
