O le afioaga o Fuailolo’o e i le itu i matu i sisifo o le motu o Upolu ma o le faitauaofai o ona tagatanuu e tusa ma le 2000, e aofia ai matai, tina ma tamaitai, aumaga ma tamaiti. E le o faitaulia ai i latou ua malaga atu i atunuu i fafo e pei o Niu Sila, Ausetalia, Amerika, ma isi.
O Fuailolo’o, e iai lona aau e amata mai lava i le itu i sasae se’ia pa’ia le itu i sisifo, i le mamao pe a ma le afa maila (1/2 maila). O le umi o le aau, pe a ma le tasi ma le afa maila (1 ½ maila). O le vaega pito i loloto o le aloalo e tusa ma le 10 – 18 futu i taimi e pe ai le tai, ae 10 – 12 futu le loloto o vaega pito i sili ona papau.
O lenei afioaga, e mamalu tele ona pulega aua e puleaina lelei e Alii ma Faipule o Fuailolo’o. O le aumaga ua matua lava saunia i taimi uma aua le tautuaina o matai. O matai latou te avatua fautuaga lelei mo ni mataupu tau lotoifale o le afioaga.
O le autu lenei sa faatalatalanoaina ma malilie autasi i ai vaega taitasi o le afioaga:
1. Ina ia puipuia le siosiomaga o le gataifale ma,
2. Toe faatupulaia le tamaoaiga o le gataifale mo tupulaga o le lumana’i.
