O le Polokalame o le Faasao na amataina e le Malo e tauala mai leai le auaunaga a le Ofisa o Faigafaiva i le tausaga e 1995. I le amataga mai la o lenei polokalame sa faapea ona lagolago malosi ai le Malo o Ausetalia e auala ma i lana AusAID i le faa-tupeina mo le 5 tausaga seia oo mai i le tausaga e 2000 ma faamuta ai loa lana fesoasoani. Peitai na e lei faamuta ai i lea tausaga ona sa tauaveina loa e le Malo o Samoa le faatupeina o lenei polokalame taua. I le taimi nei, ua oo atu le aofaiga i le 85 nuu ma afioaga ua faatinoina
ai lenei polokalame. Peitai, mai i le 85 lea, e na o le 52 nuu ma afioaga o loo tulai malosi ma faatauaina pea lenei polokalame. O le talitonuga ma le faamoemoe autu o le tele o nei afioaga o le silasila lea i le lumanai manuia mo tagata lautele o le afioaga aemaise ai o tupulaga lalovaoa.
O le polokalame o le Faasao e galulue soosoo-tauau iai le ofisa ma le afioaga i nisi o fuafuaga faataatitia aua se lumanai manuia aemaise o le toe faa-tamaoaigaina ole gataifale. I le amataina o lenei polokalame e faatinoina ai ni faatalatalanoaga ma vaega eseese o le
nuu e pei o le vasega o matai, tina ma taulelea. O nei fefaasoaaiga e faailoa mai ai faafitauli o loo faafeagai ma le gataifale o le afioaga. E talanoaina foi aafiaga ma mafuaaga o nei faafitauli ma soalaupule ai ni fofo. Ma sa faapea loa ona soalaupule ai e Alii ma Faipule,
tagatanuu o le afioaga ma le ofisa nisi o fuafuaga faataatitia e foia ai nei faafitauli. O se faataitaiga o se fuafuaga faataatia a le afioaga i lenei polokalame ole faia lea o se ogasami faasao e faasa ona solia, kolosiina pe fagotaina foi.
O nisi o fuafuaga faataatitia e tele ona faaogaina e afioaga mo le pulea ma le vaaia lelei o tamaoaiga (i’a ma figota) o le gataifale e aofia ai le faasaina o;
vailaau oona
fanaia
ava-niu-kini
tuiga, faamoa, seuga
i’a ma figota laiti
upega ma tili mataninii
lama moli-uila i po
O nisi o fuafuaga o Tusi Taiala i le tele o afioaga mo le pulea tatau ma le vaaia lelei o le siosiomaga o le gataifale e aofia ai le;
aoina o alamea (Crown-of-Thorns starfish)
faasaina o le lauina o le oneone o matafaga
lafoai o lapisi i le gataifale (matafaga)
O lenei polokalame e taua tele mo le lumanai manuia o Samoa ma ona tagatanuu. O le faaleleia o le siosiomaga ma le faatuputupulaia o le tamaoaiga o le gataifale o se faamoemoe e talitonu e mafai ona faatinoina i o tatou lava lima. E faa-tauaina tele le lagolagosua a le Pule ma le Faamalumaluga a Alii ma Faipule o afioaga i lenei polokalame.
