O le afioaga o Tafatafa ma Matavai e i le itu i saute i sasa’e o le motu o Upolu ma lona faitauaofai e tusa ma le 266 aofia ai matai, tina ma tamaitai, aumaga ma tamaiti. E le aofia ai i latou ua faimalaga atu i atunuu i fafo e i ai Niusila, Ausetali ma le Iunatie Setete o Amerika.
O Tafatafa e i ai lona a'au e mai lava i le itu i sasae seia paia le itu i sisifo i le mamao pea ma le 400 mita. O le umi o le a'au e pea ma le 3,000 mita mai le matafaga. O le vaega pito loloto o le aloalo e tusa ma le 12 futu i taimi e sua ai le tai ae 4 futu nisi o vaega o le
gataifale pea oo ina pe le tai.
O lenei afioaga e mamalu tele ona pulega aua e puleaina e Alii ma Faipule lava a le afioaga. O le aumaga e lava saunia i taimi uma aua le tautuaina a matai, o tina latou te avatua fautuaga lelei mo ni mataupu tau lotoifale o le afioaga.
E tele ituaiga faigafaiva e mafai ona faatinoina i le aloalo o le afioaga o Tafatafa. O nisi o nei ituaiga faigafaiva e i ai matatao, uaua malau (toso), ma le faaaogaina o upega (e tele ina faatinoina e alii) mo le fofoga taumafa a le aiga pe faatau foi. O le aoina ma le eliina o figota i luga o le aau o le galuega patino lava lea a tina ma le fanau mo taumafa a le aiga.
O le faatinoina o faigafaiva-le-talafeagai e i ai fanaia ma ava-niu-kini ua matua faasaina lava i lalo o le pulega mamalu a Alii ma Faipule. E tutusa lelei lava ma le faaaogaina o tane maulu ma mea manava (SCUBA gear) i fagotaga ua matua faasaina lava ona toe faatinoina i gataifale o le afioaga.
O le tele o i'a sa maua i aso ua mavae ua faigata ona maua i aso nei. O i'a o le aloalo e i ai lo, poge ma alogo, anae ma mataeleele sa tele ma faigofie ona maua i le 30 tausaga talu ai. E oo foi i figota e i ai le sisi, faisua faapea sea, loli, mamao ma fugafuga sa tele i aso ua mavae. I le taimi nei, o nei i'a ma figota ua pau maualalo le faitau aofai ma e tele ni itula e faaaluina mo fagotaga faatoa maua se meaai mo le aiga, pea faatusatusa i le 30 tausaga ua mavae.
O Tafatafa e i ai ona tulafono i aso ua mavae e faasaina ai faigafaiva-le-talafeagai e pei o fanaia, ava-niu-kini, vailaau oona, lama moli-uila ma tane maulu (SCUBA gears) ua matua faasaina ona toe vaaia. Ua faasaina foi tagata mai isi afioaga ona toe fagotaina gataifale o lenei afioaga.
E ui lava ina ua i ai tulafono e pei ona taua, e le o atoatoa lona faatinoina ma lona vaaia ona o le le aloaia e au faifaiva mai isi afioaga. O le isi itu o le mamao lea i tai o nofoaga o loo faatinoina ai nei ituaiga o faigafaiva atoa ai ma auala o loo faaaogaina.
